Guëde-Lune-Spiël-BOULE

„Wat is dan Boule?“ „Boule is en Kuëgelspiël, dat eengslik uut Frankriek kümp.“ „Jau – dat häw ussen Bunnes- kansler Adenauers Konrad män ümmer spiëlt!“„Nä, dat wüör Boccia – eengslik uut Italgen.“ „Aoch so – un wu löp dat bi Boule?“ So of bolle so löp een Praot af, wan ik enen vötäl, dat ik Boule-Spiëler sin.
Spiëlt wät met twe Lüde 1:1 – fransöösk ‚Tête-à-Tête‘ (TaT) näömt, of in Manschuppen 2:2 ‚ näömt Doublette‘, of 3:3 näömt ‚Triplette‘. Bi ‚Tête-à-Tête‘ un bi ‚Doublette‘ häw jerren Spiëler drai Kuëgeln – bi ‚Triplette‘ blaus twe Kuëgeln.

Vüör dat Spiël stelt sik alle Metspiëlers vüör un wünsk sik een „Schöön Spiël“.
Algemeen wät „Du“ sägt un sik unnerneen met Vüörnaome anküert.
Alle Smiëte wäert uut nen Kring to’t Afsmiten maakt. De Spiëlers müët daobi met baide Föte fast in düssen Kring to’t Afsmiten staon. Daobi draw enen Spiëler – wan he dat nao kan – aower auk uut de Huke spiëlen.
Een Spiëler uut de Manschup, de dat Laus wunnen häbt, smit iärstan ene lütte
Tüerkuëgel uut Holt tüsken ses of tain Meters wied.
De Fransenslü näömt de Tüerkuëgel ‚Cochonnet‘ – daorüm sägt wi auk ‚Suëge‘ of miärstdeels ‚Swienken‘ to de Tüerkuëgel.

Dän smit een Spiëler ene van sine Spiëlkuëgeln uut Staol so naige äs iäben müëglik an dat ‚Swienken‘. Daonao is een Spiëler van de ännere Manschup an de Rige un dat so lange, bes ene Spiëlkuëgel naiger an dat ‚Swienken‘ lig, äs de Kuëgel van de ännere Manschup.
Methän mos vösöken, ene Kuëgel biäter to schicken, dat hät to läggen, of ene guëde Kuëgel van de ännere Man- schup druuttodrücken of jä söws wägtoballern.
Wan alle Kuëgeln spiëlt sint, wäert de Punkte tält. Blaus de Manschup krig Punkte, van de ene Kuëgel an naigsten an dat ‚Swienken‘ lig – enen Punkt för jerre Kuëgel, de naiger lig, äs de beste Kuëgel van de ännere Manschup. Dat is nich ümmer eenfak. Mannigmaol müët de Spiëlers akkraot naomiäten – viëlmaols gait et daobi blaus üm Millimeters.
De naigste Rünne – bi dat Boule ‚Upnaome‘ näömt – gait et met de Manschup los, de vüördäm enen of märe Punkte maakt häw.
Een Spiël is wunnen, wan tosammen 13 Punkte maakt häs. Et giw methän kinen ‚Gliekstand‘.
De Kuëgeln laupt nich altied so, äs se laupen süëlt. Mannigmaol dräps auk de Kuëgel nich, de du wägballern wis. Aower dat Boule-Spiël mäk waan viël Plaseer – daorüm sägt wi to dat Spiël auk dat ‚Guëde-Lune-Spiël-Boule‘!

Wissenswertes

Auk de wideren Gebodte läert sik füske bi dat Spiëlen. Boule is eenfak to läern – aower swaor to winnen!

Ik spiël bi de ‚KfK-Münster‘ in ene LIGA-Manschup. Dän näömt se dat nich ‚Boule‘ sunnern ‚Pétanque‘.
Bi dat ‚Pétanque‘ giw dat Mesterschuppen – bes to de Wiältmesterschup!

Nu huopt alle Kuëgel-Frönde, dat ‚Pétanque‘ auk nao olympsk wät.

Das war Plattdeutsch (Niederdeutsch),

Klingt komisch, is aber so.

Veröffentlich:

TORHAUS aktuell (2021-2) – Stadtheimatbund-Münster

Edmund Bischoff

Boule is eenfak to läern – aower swaor to winnen!
Boule ist einfach zu lernen – aber schwer zu gewinnen!

11.05.2021  Edmund Bischoff